2 vikur (tæpar) í 10 km!

Jæja..þá er kvennahlaupið afstaðið þetta árið. Skoppaði 4,5 km og skv. tímaverði var ég ca 33 mínútur með þá (ekki nákvæmasta mæling í heimi). En gott að vita svona ca tímann. Skoppaði svo á æfingu í dag og var ca 32,5 mínútur með 4,8 km (líka ónákvæm mæling).

Annars er ég í sumarfríi núna, eða svona hálfpartinn. Er í fríi frá Heilsugæslunni en er að vinna 100% í Orkuhússvinnunni í staðinn. Sé samt fram á allsherjarfrídag á morgun, stefni að því að fara í gönguferð (eða skokktúr skv. hlaupaplani) og gera svo eitthvað sniðugt 🙂 Sjáum til hverjar efndirnar verða 😉

Frumburðurinn átti svo aldeilis góðan dag í dag. Fékk sumarvinnu í Edduveröld til 15. ágúst og svo var hún boðuð í AFS viðtal vegna skiptinemadvalarinnar 😀 Bara snilld! Núna bíðum við bara eftir að heyra frá FÁ, hvort hún komist inn eða ekki!! Spennó!

En, ætla að fara að hundskast í bælið! Meira síðar!

Birt í Uncategorized | Færðu inn athugasemd

Síðan síðast…

…hefur svo sem ekkert gerst í hlaupamálum…dagarnir renna svo saman hjá manni að maður man ekki alveg hvenær maður gerir hvað! Fór samt örugglega að hlaupa á sunnudaginn og hljóp Hvanneyrarhringinn. Sá á vegalengdinni að ég var að hlaupa hraðar en síðast og það var bara fínt, ofreyndi mig ekki eða neitt og þá hlýtur maður að vera að gera eitthvað rétt 😉 Svo er það bara kvennahlaupið á morgun og þá ætla ég að hlaupa 4,5 km, þ.e.a.s. eftir hlaupaprógramminu sem ég er að fylgja (minnir að það sé hlaup í 9 mínútur og labb í 1, endurtaka x3).

Hins vegar gerðist það merkilegt síðan síðast að frumburðurinn útskrifaðist úr grunnskóla! Henni gekk alveg hreint ágætlega í prófunum, var með 8 í meðaleinkunn. Finnst það bara glæsilegur árangur! Við gáfum henni hárblásara í útskriftargjöf og tengdaforeldrarnir gáfu henni sléttujárn (við ætluðum að gefa henni hvoru tveggja en tengdó var með mér þegar ég keypti þetta þannig að hún vildi líka 😉 ). Tími ekki að láta hana fá mínar græjur þegar hún fer suður í skóla, þannig að hún þurfti sitt eigið 🙂

Eldri sonurinn kláraði svo 2. bekk og gekk líka vel þar. Er samt pínu sveimhugi og þarf að taka sig á í athyglinni og einbeitingunni en fékk góða umsögn í skólanum. Spennandi að sjá hvernig þriðji bekkur gengur! Úff…hann er að byrja í 3. bekk!! Og litli gormurinn í skólahóp í leikskólanum á næsta ári…hvert fer þessi tími eiginlega???

En já…ætli það sé ekki best að fara að hvíla sig fyrir hlaupið á morgun. Stefnan er að hlaupa þetta á undir 40 mínútum sem ég held að gangi alveg. Reyni að fylgjast með tímanum og pósta svo árangrinum hér 😉

Óver and át!!

Birt í Uncategorized | Færðu inn athugasemd

Breytt plön…og líklega breytt markmið þá?

Þarf eitthvað aðeins að hugsa þetta. Kemst sem sagt ekki í Mývatnsmaraþonið vegna jarðarfarar. Ætlaði þá að nota plan B sem datt upp í hendurnar á mér og hlaupa 10 km í Heilsuhlaupi krabbameinsfélagsins á fimmtudaginn, en þá er akkúrat árshátíð grunnskólans hérna á eyrinni þannig að ég ætla að setja barnið mitt í forgang. Þá er bara að virkja plan C (sem mér bara datt í hug núna áðan) og það er að hlaupa 10 km í Miðnæturhlaupinu þann 24. júní…þá hef ég 2 mánuði eftir það til að æfa þannig að ég geti bætt tímann minn í 10 km í Reykjavíkurmaraþoninu. Er þetta ekki bara ágætt plan? Held það…ætlaði hvort eð er að fara í Miðnæturhlaupið og hlaupa 5 km en þar sem 10 km hlaupin mín í þessari viku hafa þann tendens að verða fyrir einhverju ónæði þá geri ég þetta bara svona í staðinn. Er meira að segja í sumarfríi þessa vikuna þannig að það er ekki eins og ég þurfi að vakna til vinnu á þriðjudeginum! 😀 Bara snilld! Sem sagt plönin breytast en ekki markmiðin 🙂

En já…hreyfing frá því síðast…
23. maí: 4,8 km (hlaup/labb)
26. maí: 4,5 km (hlaup/labb)
27. maí: 4,5 km (hlaup/labb)

Planið er sem sagt svona:
Mæta á Flandraæfingar x3 í viku og fylgja byrjendaprógramminu frá hlaup.is.
Hlaupa 4,5 km í Kvennahlaupinu 8. júní
Hlaupa 10 km í Miðnæturhlaupinu 24. júní
Hlaupa 10 km í Reykjavíkurmaraþoninu 24. ágúst
Flandraæfingar og einhver hlaup á milli 24. júní og 24. ágúst. 

Held þetta sé bara alveg hreint ágætt plan 🙂 Ætla að fara að halda áfram að prjóna núna, fyrst ég er búin að plana svona rosalega mikið 😉

Birt í Uncategorized | Færðu inn athugasemd

Dagurinn í dag…

Ætla að fara að skrá niður hvað ég hreyfi mig mikið…fór á hlaupaæfingu í dag og tók viku 5 (eða 6) í byrjendahlaupaprógramminu sem við erum að fylgja. Hlaupa í 8 mínútur og labba 2, endurtaka þrisvar. Náði 12 hringjum (með upphitunarlabbhring), sem jafngildir um 4,8 km. Náði að hlaupa í allar 8 mínúturnar…er orðin bjartsýn á að ég nái að hlaupa eitthvað á Mývatni eftir 9 daga!!! 

Birt í Uncategorized | Færðu inn athugasemd

Gleðilegt sumar :)

Jæja, þá er sumardagurinn fyrsti runninn upp í öllu sínu veldi, og bara allt gott um það að segja. Ágætlega sumarlegt gluggaveður úti þannig að maður bara nýtur þess að horfa út um gluggann í augnablikinu. Hlaupaæfing seinnipartinn og þá athugar maður á eigin skinni hvernig viðrar.

Fátt og lítið að frétta síðan síðast. Fór á hlaupanámskeið síðustu helgi sem var alveg hreint rosalega gott!! Maður lærði heilmikið á þessu sem getur nýst manni með áframhaldið, aðallega það að maður verður að vera þolinmóður og skynsamur þegar kemur að hlaupum. Ekki alveg mínar sterkustu hliðar en það hlýtur að koma 😉 Það voru svo verklegar æfingar í lok námskeiðsins og þótt þær væru mjög einfaldar þá tóku þær sko á og maður var eins og nírætt gamalmenni næstu dagana á eftir. Beinhimnubólgan reyndar aðeins farin að láta á sér kræla aftur (nú fer að verða spurning um göngu/hlaupagreiningu) þannig að ég þarf að taka því rólega. Finnst ég samt eiginlega ekki geta það þar sem að ég er að fara að taka þátt í 10 km hlaupi á Mývatni 1. júní. En ég hef tekið þá ákvörðun að taka því bara rólega þá, ekki að vera að stressa mig á að ná einhverjum tíma þar sem að þetta er fyrsta almenningshlaupið sem ég tek þátt í. Ætla að hlaupa þegar ég get og labba inn á milli og er  í raun bara sátt með hvaða tíma sem er. Hins vegar ætla ég að vera dugleg í sumar og stefna að því að bæta 10 km tímann í Reykjavíkurmaraþoninu. Einhver almenningshlaup verða þarna á milli, fer í Kvennahlaupið 8. júní (5 km), Jónsmessuhlaupið 23. júní (held ég, líka 5 km) og svo einhver hlaup í júlí og byrjun ágúst. En já já..þetta fer allt saman einhvernveginn.

En…ætlaði bara að láta vita að ég væri með lífsmarki 😉 Best að fara að sumrast eitthvað 😉

Birt í Uncategorized | Færðu inn athugasemd

Mánaðarkort: Tékk! ;)

Skoppaði í íþróttamiðstöðina í dag, rétt fyrir kl. 18 og verslaði mér mánaðarkort. Þetta einungis til að geta mætt tvisvar í viku í styrkjandi leikfimi eða hvað þetta nú heitir…tíminn byrjaði svo kl. 18:10 og 50 mínútum síðar var hann búinn. Hrikalega góðar æfingar (þó ekki á meðan á þeim stóð :p ) og núna finn ég harðsperrurnar færast yfir vöðvana. Það bókstaflega lak af mér svitinn sem hefur ekki gerst í mörg ár og ég hlakka til næsta tíma sem verður á fimmtudag, beint á eftir hlaupaæfingu. Svo á laugardaginn er vonandi hlaupanámskeið hjá Símenntunarmiðstöð Vesturlands, þar sem við verðum leidd í allan sannleikann um allt sem tengist hlaupum og endað á verklegri æfingu og leiðbeiningu. Eftir það ætti maður að geta hlaupið eins og vindurinn…ef það eru ca 2 m/sek 😉

Er sem sagt frekar sátt eftir daginn og held ég fari bara að hundskast í bælið…er eiginlega að lognast út af hérna fyrir framan tölvuna 🙂

Góða nótt! Meira síðar…

Birt í Uncategorized | Færðu inn athugasemd

Herðing á sperrum

Jæja, fór á hlaupaæfingu á fimmtudaginn (í gær) sem var alveg svakalega gott. Skemmst frá því að segja að ég var svo „plötuð“ (þurfti nú ekki mikið að snúa upp á handlegginn á mér) á einhverskonar styrktaræfingu, ekki til að styrkja neitt málefni heldur skrokkinn á manni 😉 Frír prufutími og alles þannig að ég ákvað að prófa svona að gamni mínu. Skemmst frá því að segja að þetta var svona líka ofboðslega gaman og skemmtilegt og gott og ég bara veit ekki hvað þannig að næst á dagskrá er að fara í þessa tíma tvisvar í viku út maí, en þá hættir þetta námskeið. Vonandi verður það bara aftur næsta haust því það er víst ógurlega gott að styrkja líkamann eitthvað svona aukalega þegar maður er að hlaupa. 🙂 En já…er frekar stirð í skrokknum og finn til í alls konar vöðvum sem ég hef ekki notað lengi af neinu viti, eins og vísað er í í fyrirsögninni.

Hef svo líka verið hrikalega dugleg að borða grænmeti og ávexti þannig að þetta er allt á réttri leið. Datt reyndar í súkkulaði í hádeginu í vinnunni, en ég er búin að ákveða það að ætla ekki að forðast nammiát eins og heitan eldinn. Frekar að fá mér bara minna í einu þegar ég fæ mér 🙂

Svo ákvað ég að prófa að fara í nýju sælkerabúðina í Borgarnesi…finnst það ágætis nafn á hana, ekki hægt að kalla þetta fiskbúð þar sem þau eru líka með kjöt á boðstólum þannig að ég kalla þetta sælkerabúð. Keypti fiskrétt þarna sem þurfti bara að henda í ofn í 15-20 mínútur og voila! Maturinn tilbúinn! Bragðaðist líka svona ljómandi vel og hef ég ákveðið að versla fisk þarna um það bil einu sinni í viku.

Í dag gerði ég svo eitthvað sem er alveg þvert á mína sannfæringu en ég bara varð. Málið er nefnilega það að ég lofaði sjálfri mér að ég skyldi alltaf versla mér lopa og svoleiðis í þar til gerðum handavinnubúðum og ekki versla svoleiðis í neinum stórmörkuðum. Hef staðið við það þangað til í dag. Það er nefnilega 30% afsláttur af lopa (léttlopa, álafosslopa og kambgarni) í Nettó í Borgarnesi í dag og ég bara gat ekki sleppt því að kaupa slatta af alls konar litum. 179 krónur dokkan…það er ekki mikið. Minnir að hún kosti 249 krónur venjulega. Þannig að ég á orðið helling af léttlopa í alls konar litum. Var nú reyndar skynsöm og keypti slatta af hvítu, hærusvörtu og gráum og svo líka ofboðslega fallega dökkmórauðum. Hlakka til að prjóna úr þessu öllu.

En jæja…nóg komið af bloggi í bili. Þangað til næst

Birt í Uncategorized | Færðu inn athugasemd

Að standa við stóru orðin…

…gengur nú ekkert allt of vel hjá mér…hljóp ekkert um helgina og þurfti svo að fara á fund í dag akkúrat á hlaupaæfingatíma, þannig að ekki hljóp ég þá heldur. En…þetta kemur. Átti annars bara þrælgóða helgi. Var heima með börnunum mínum á laugardaginn af því að eiginmaðurinn fór í rolluskoðunarferð eins og kom fram í síðasta pósti. Á sunnudeginum fór ég svo suður til að hjálpa til við aðlögun mömmu við nýtt hjúkrunarheimili. Ekki það að hún hafi þannig séð verið að fara á nýtt heimili, en þau voru að flytja í nýtt húsnæði sem er alveg rosalega flott. Tók upp úr töskunni hennar og raðaði inn í fataskápinn, spjallaði við hana og sat svo bara hjá henni og naut samverunnar. 

Dagarnir líða bara annars einn af öðrum. Er svolítið að berja sjálfa mig niður af því að ég kem svo fáu í verk sem ég ætti að gera…letin hefur allt of oft yfirhöndina og heimilið, lærdómur og svoleiðis situr allt of oft á hakanum….og hlaupin. Það fyndna við það er að ég finn að ef ég væri ekki á þunglyndislyfjunum þá væri ég skelfilega langt niðri núna. Ef ég reyni eitthvað að lýsa þessu þá finn ég svona vanlíðan í „hjartanu“ en lyfin gera það að verkum að ég get verið hress og kát alls staðar og við alla og ég dett ekki niður út á við. Ferlega furðulegt og ég eiginlega veit ekki hvernig ég á að lýsa þessu öðruvísi. Finn fyrir að mér líði illa en næ ekki að velta mér upp úr því eða bregðast við því á „eðlilegan“ hátt að mér líði þannig. Og mér finnst það í rauninni frábært, þ.e. allra vegna, það á nefnilega enginn skilið að ég komi fram við þá eins og ég geri eins og ég var þegar ég var upp á mitt versta, ekki einu sinni ég! En nú er ég komin í hring og ætla að fara að gera eitthvað sniðugt 🙂 Hætta í tölvunni og fara að undirbúa drengina fyrir háttinn og svoleiðis 🙂

Meira síðar!!

Birt í Uncategorized | Færðu inn athugasemd

Aðhald

Jæja, eftir þó nokkuð blogghlé þá er ég byrjuð aftur. Svo sem ekkert merkilegt gerst síðan síðast (man ekki einu sinni hvenær það var) nema hvað að ég ákvað að standa við eitt markmið ársins 2013 og það er að hlaupa 10 km í Mývatnsmaraþoninu þann 1. júní. Ég er sem sagt búin að skrá mig og nú taka við þrotlausar **hóst hóst** æfingar út maí. Mér var bent á 6 vikna hlaupaprógramm sem er undirbúningur fyrir 10 km hlaup og er hægt að miða æfingarnar út frá hvaða tíma maður stefnir að því að hlaupa á. Segi nú bara fyrir mitt leyti að ég verð sátt ef ég næ þessu á undir 1,5 klst, þá get ég líka stefnt að öðru markmiði sem tengist þessu og það er að bæta 10 km tímann í Reykjavíkurmaraþoninu í ágúst 😉 Stefni að því að skrá mig í það á næstu dögum þannig að það er allt að gerast. 

Ég fór á hlaupaæfingu í fyrradag, hljóp með tveimur vinkonum og þar sem þær höfðu vit á því að hlaupa hægt þá gerði ég það líka. Hefði a.m.k. hlaupið mun hraðar hefði ég verið ein. En það er víst gott að byrja rólega þannig að ég ákvað að gera það bara. Mætti ekki á hlaupaæfingu í dag, eiginmaðurinn í sauðfjárskoðunarferð í dag og ég er enn ekki það staðföst að ég sé ekki dugleg að finna afsakanir fyrir að fara ekki á æfingar. Fer svo á fund á mánudaginn þannig að ég kemst heldur ekki á æfingu þá. Þá er bara að hlaupa í kvöld eða á morgun, en ég reyndar eyði morgundeginum í Reykjavíkinni, veit ekki alveg hvað ég verð lengi þar. Hjúkrunarheimilið sem mamma er á er að flytja í nýtt húsnæði og starfsfólk bað aðstandendur vistmanna um að vera extra mikið hjá þeim fyrstu vikuna eftir flutninga eða svo. Pabbi verður reyndar þarna líka, en um að gera að létta aðeins undir með honum. En já…það var þetta með hlaupin 😉 Eins og þið sjáið þá er ég með afsakanir á reiðum höndum 😉 En…ég skal fara út að hlaupa um helgina hvað sem tautar og raular. Og hananú!! 🙂

En jæja…þarf að fara að gera eitthvað af viti, þannig að ég ætla að hætta þessu blaðri mínu…Mun hins vegar nota þetta blogg sem aðhald og svoleiðis þangað til hlaupi lýkur og svo auðvitað í framhaldinu..það koma nefnilega alltaf ný hlaup!! 😀

Þangað til næst…

Birt í Uncategorized | Færðu inn athugasemd

Hlaupamál og fleira…

Jamms…það getur barasta verið hlaupin hjá mér séu í pínu uppnámi, a.m.k. hvað varðar næstu daga/vikur. Málið er að beinhimnubólgan er komin aftur og þótt mér sé það þvert um geð þá held ég að ég verði að reyna að hvíla mig aðeins, tjah…segjum kannski fram í febrúar eða þar um bil. Ég nýtti mér aðstöðu mína og spurði lækni hvað væri hægt að gera við þessu og hún sagði hvíld, teygjur og athuga hlaupaskóna. Ég tók hana á orðinu og keypti mér nýja hlaupaskó og líka legghlífar sem ég hafði heyrt vel látið af, og prufukeyrði hvoru tveggja síðasta mánudag. Þetta var allt saman voðalega notalegt, en ég fór að hugsa á þessari æfingu hvort það væri nú ekki sniðugt að hvíla sig og ná beinhimnudæminu almennilega úr og byrja svo að athuga hvernig skórnir virka. Held að þetta batni ekki nema með hvíld hvort sem mér líkar betur eða verr og svo get ég byrjað að spretta úr spori 😉 

Annars gengur allt bara sinn vanagang…ja, alla vega hleypur það ekki 😀 Ekki þá nema tíminn! Janúar að verða búinn og hann sem var rétt svo byrjaður. Skólinn að byrja og leggst bara vel í mig, verður fín önn, er ekki nema í 4 einingum þannig að vonandi verður þetta bara einfalt. Annar áfanginn þar að auki próflaus 😉 Bara snilld!

Ætlaði að segja eitthvað annað hrikalega gáfulegt, en það datt úr mér 😉 Man það bara seinna, nú eða bara ekki.

Ætla að fara að henda yngstu afkvæmunum í bælið, gæti orðið snúið með þann yngri þar sem að hann sefur í efri koju 😛 

Birt í Uncategorized | Færðu inn athugasemd